Գյուղատնտեսության ապահովագրության պիլոտային ծրագիրը հնարավորություն է ընձեռում գյուղացիական տնտեսություններին ապահովագրելու իրենց պտղատու այգիները, դաշտերը, հողատարածքները մի շարք բնական վտանգավոր երևույթներից:

Ապահովագրվող մշակաբույսեր

• Խնձոր
• Դեղձ
• Սալոր
• Հացահատիկ (աշնանացան և գարնանացան՝ ցորեն, գարի, վարսակ)
• Կարտոֆիլ
• Ձմերուկ
• Սեխ
• Բալ
• Կեռաս

Ապահովագրական ռիսկեր

Գործող Պայմանների համաձայն, ապահովագրության պայմանագրով ապահովագրության ենթակա ռիսկերն են.

• Կարկտահարություն, որը սովորաբար անձրևի և/կամ քամու հետ ուղեկցվող գնդաձև սառցե կտորների տեսքով մթնոլորտային տեղումներն է, որոնք կարող են ֆիզիկական վնաս հասցնել ծառերի և մշակաբույսերի հատվածների հյուսվածքներին՝ հանգեցնելով բերքատվության կրճատմանը։
• Հրդեհ՝ անվերահսկելի բռնկում և այրում, որն առաջանում է բնական գործոնների պատճառով՝ ներառյալ բարձր ջերմաստիճանը, կայծակի հարվածը: Գործող Պայմանների համաձայն՝ հրդեհի ռիսկը վերաբերում է բողբոջների, ծաղիկների, պտուղների վնասմանը հրդեհի հետևանքով (ծուխ, մուր), ինչպես նաև հրդեհը մարելու միջոցառումների իրականացման ժամանակ ապահովագրված բերքին հասցված վնասին և չի վերաբերում որթատունկի և ծառերի վնասմանը։
• Երաշտ, որը տեղումների արդյունավետ քանակի բացակայությունն է օդի բարձր ջերմաստիճանի պայմաններում։

Կարևոր է․

Չնշված այլ գործոնների ազդեցության հետևանքով հասցված վնասը չի փոխհատուցվելու ապահովագրական ընկերության կողմից։

Գործողության տարածք

Ապահովագրությունը, կախված ռիսկերից և մշակաբույսերից, գործում է ՀՀ հետևյալ մարզերում․

• «կարկտահարության և հրդեհ» ռիսկից դեղձի ապահովագրության դեպքում՝ Արմավիրի, Արարատի, Վայոց ձորի, Կոտայքի, Տավուշի, Արագածոտնի, Գեղարքունիքի, Լոռու, Սյունիքի և Շիրակի մարզերում գտնվող հողատարածքների վրա
• «կարկտահարություն» ռիսկիցխնձորի, սալորի, կարտոֆիլի, բալի, կեռասի ապահովագրության դեպքում՝ Արմավիրի, Արարատի, Վայոց ձորի, Կոտայքի, Տավուշի, Արագածոտնի, Գեղարքունիքի, Լոռու, Սյունիքի և Շիրակի մարզերում գտնվող հողատարածքների վրա, իսկ ձմերուկի և սեխի ապահովագրության դեպքում՝ Արմավիրի, Արարատի և Արագածոտնի մարզերում գտնվող հողատարածքների վրա,
• «երաշտ» ռիսկից հացահատիկի ապահովագրության դեպքում՝ Արմավիրի, Արարատի, Վայոց ձորի, Կոտայքի, Տավուշի, Արագածոտնի, Գեղարքունիքի, Լոռու, Սյունիքի և Շիրակի մարզերում գտնվող չոռոգվող հողատարածքների վրա

Ապահովագրության պայմանագրի ձեռքբերումը

Գյուղատնտեսության ապահովագրության պայմանագիր ձեռք բերելու համար անհրաժեշտ է․

1. Ներբեռնել և լրացնել ԱՊԱՀՈՎԱԳՐԱԿԱՆ ԴԻՄՈՒՄԸ
2. Լրացված և ստորագրված ԱՊԱՀՈՎԱԳՐԱԿԱՆ ԴԻՄՈՒՄԸ ուղարկել agro@liga.am էլեկտրոոնային հասցեին
3. Մենք կապ կհաստատենք Ձեզ հետ կարճ ժամանակահատվածում և կտեղեկացնենք հետագա կայլերի վերաբերյալ

Կարևոր է․

• Մեկ կադաստրային վկայագրի կամ վարձակալության պայմանագրի ներքո գտնվող հողատարածքը պետք է ապահովագրվի ամբողջությամբ
• Մեկ Պայմանագրով ապահովագրվում է մեկ հողատարածք
• Յուրաքանչյուր հողատարածքի ապահովագրության համար սահմանված է ապահովագրական գումարի 20%-ի չափով չհատուցվող գումար

Ապահովագրության ժամկետներ

2024 թվականին բերքի համար ապահովագրության պայմանագիրը կարող է կնքվել հետևյալ ժամկետով.

Մշակաբույս	Ռիսկ	Պայմանագրի կնքման վերջնաժամկետ	Պայմանագրի գործողության ժամկետ
Դեղձ	կարկտահարություն և հրդեհ	Մայիսի 31	Ապրիլի 1 - Հոկտեմբերի 10
Խնձոր	կարկտահարություն	Մայիսի 31	Մայիսի 1 - Հոկտեմբերի 10
Հացահատիկ (ցորեն/գարի/վարսակ) Աշնանացան (չոռոգվող դաշտեր)	Երաշտ	Մայիսի 31	Մայիսի 1 - Սեպտեմբերի 1
Հացահատիկ (ցորեն/գարի/վարսակ) Գարնանացան (չոռոգվող դաշտեր)	Երաշտ	Մայիսի 31	Մայիսի 1 - Հոկտեմբերի 1, Բայց ոչ ավելի շուտ, քան ծլելու շրջանը
Սալոր	կարկտահարություն	Մայիսի 31	Ապրիլի 1 - Սեպտեմբերի 1
Կարտոֆիլ միջին (միջին-վաղահաս, միջին-ուշահաս) ուշահաս	կարկտահարություն	Մայիսի 31	Ապրիլի 1 - Հոկտեմբերի 1, բայց ոչ ավելի շուտ, քան սածիլների առաջացման փուլը
Ձմերուկ	կարկտահարություն	Մայիսի 31	Մայիսի 1 - Հոկտեմբերի 1, բայց ոչ ավելի շուտ, քան ծլելու շրջան
Սեխ	կարկտահարություն	Մայիսի 31	Մայիսի 1 - Հոկտեմբերի 1, բայց ոչ ավելի շուտ, քան ծլելու շրջան
Բալ և կեռաս	կարկտահարություն	Մայիսի 31	Մայիսի 1 - Հուլիսի 1, բայց ոչ ավելի շուտ, քան պտղի սկզբնավորման և (կամ) ձևավորման փուլը

Ապահովագրավճարի չափը և վճարումը

Ապահովագրավճարի չափը կախված է համայնքից, մշակաբույսից, ապահովագրվող ռիսկից/ռիսկերից:

Ապահովագրավճարի սակագների վերաբերյալ մանրամասները ներկայացված են Պայմանների Հավելված 2-ում։

Կարևոր է․

Ապահովագրավճարը մասամբ սուբսիդավորվում է պետության կողմից։ Մասնավորապես․

• 50% սուբսիդիա դեղձի համար՝ «կարկտահարություն և հրդեհ» ռիսկի դեպքում,
• 50% է սուբսիդիա խնձորի, սալորի, ձմերուկի, սեխի, կարտոֆիլի, բալի և կեռասի համար՝ «կարկտահարություն» ռիսկի դեպքում,
• 60% «երաշտ» ռիսկի դեպքում հացահատիկի համար։

Գյուղատնտեսության ապահովագրության պայմանագիր կնքելու համար անհրաժեշտ փաստաթղթեր

• Ապահովադրի անձը հաստատող փաստաթուղթ
• Հողամասի սեփականության վկայական, վարձակալության պայմանագիր կամ իրավական այլ փաստաթղթեր
• Լրացրած ԱՊԱՀՈՎԱԳՐԱԿԱՆ ԴԻՄՈՒՄ
  

Ուզու՞մ եք իմանալ ավելին:

Մենք ուրախ կլինենք պատմել Ձեզ գյուղատնտեսության ապահովագրության մասին և կօգնենք արագ ձևակերպել վկայագիրը:
Զանգահարե՛ք մեզ (012) 88 88 88 հեռախոսահամարով կամ գրե՛ք agro@liga.am հասցեին: